पाहिले अंती जगाच्या काय मी ही साधले..
सूक्ष्म झालो मीच आणिक मी जगाला व्यापले
कृष्ण होतो गोकुळी अन् राम होतो दशरथी
कंस - रावण मीच होवुन मीच मजला मारले
बोधिसत्वाच्या रुपाने धम्मतत्वा मांडण्या..
त्यागुनी प्रासाद-गोष्टी मीच मजला त्यागले
प्रलयकारी होवुनी उद्दाम होतो मी जरी...
नाव तारूनी मनूची मीच मजला तारले
इंद्र म्हणुनी कृद्ध होता वरुणरूपे बरसलो -
आणि गोवर्धनस्वरूपी मीच मजला उचलले
मीच तो नरसिंह झालो पोट माझे फाडण्या
पाय ठेवूनी शिरावर मीच मजला गाडले
काव्य स्फुरता सर्वव्यापी गझल होवुन राहिलो
अन् समीक्षा होत तत्पर मी मला धिक्कारले
(१ प्रयत्न)
गझल
- प्रतिसाद देण्यासाठी येण्याची नोंद करा