चाललो निघून मी

बंद घे करून दार...चाललो निघून मी
पावले न थांबणार..चाललो निघून मी

सारखा कसा फसेन हासण्यास त्या तुझ्या ?
मी बये तसा हुषार..चाललो निघून मी

हा तुझ्यामुळेच घोळ, तूच निस्तरून जा
फक्त तू जबाबदार --- चाललो निघून मी

राहिलीस तू अजिंक्य एवढे करुनही
चल, मला कबूल हार..चाललो निघून मी

मी पुन्हा न भेटणार, परतणारही न मी
फैसला न बदलणार..चाललो निघून मी

द्यायचा कसा निरोप आज सांगतो तुला
हास फक्त एकवार.......चाललो निघून मी

येथल्या फुलांमधे न गंध, रंग राहिले
शोधण्या नवी बहार..चाललो निघून मी