हे शहरच आता दिसते पैशात पूर्ण मुरलेले
पण सदरे सुखि व्यक्तींचे केव्हाच जीर्ण झालेले
ऋतु हा पानगळीचा, हे वृद्ध झाड वठलेले
त्यावरचे शेवटचेही नुकतेच पर्ण गळलेले
ही घरे येथली दिसती शुभ्रधवल रंगांची
परि अंतर्यामी त्यांच्या कितिक हे वर्ण दडलेले
वसती दुर्योधन येथे, कैक ते श्रेष्ठ अर्जुनही
अन महाभारती इथल्या कित्येक कर्ण पिचलेले
मज उडावयाचे होते, आकाश भेदण्यासाठी
प्रत्येक स्वप्न माझेही गाळात पूर्ण बुडलेले
गझल
- प्रतिसाद देण्यासाठी येण्याची नोंद करा