आसवांचे सूर ओल्या पापण्या गातात आता
माझिया डोळ्यात आहे जागलेली रात आता
चांदणे आलेच नाही अंगणी माझ्या कधीही
अंगणाशी बोलतो मी चांदण्या शब्दात आता
कोणता कंदील लावू जिंकण्या काळोख येथे ?
काजळी होते दिव्याची पेटणारी वात आता
मोगरा नाही तुझा मी तू मला माळू नको ना
वादळे का मागशी तू मोकळ्या केसात आता ?
सोसतो मी वार सारे आपुलाले - वेगळाले
वेदनेला भाव आहे कोणत्या घावात आता ?
मयुरेश साने...दि...१३-जानेवारी-११
गझल
- प्रतिसाद देण्यासाठी येण्याची नोंद करा