जात आहे मार्ग टाळूनी तुला

बोल, 'सारे व्यर्थ सोडूनी तुला'..
मी बरा जाईन घेऊनी तुला ?

कापती लिहिण्यास बोटे का तुझी ?
मी दिले केंव्हाच सोडूनी तुला

चंद्रही अगतिकपणे बघतो; असे -
चांदण्यांचे हाल पाहूनी तुला

याच दिवसाचा तसा केलाय मी
वेगळा अंदाज भेटूनी तुला

आज उठले नवनवे रोमांच का
नेहमीचा स्पर्श देऊनी तुला ?

मी कधी ना टाळले भेटायचे
जात आहे मार्ग टाळूनी तुला

हे खरे नाते तुझ्या-माझ्यातले
मी कुठे उरलोय जाळूनी तुला