...जन्म चकव्यासारखा !

.......................................
...जन्म चकव्यासारखा !
.......................................

भेटशी का सांग फसव्यासारखा ?
टाळशी का कर्जबुडव्यासारखा ?

या मनाचा कोणता आजार हा ?
वाटतो आराम थकव्यासारखा !

सोस तू आयुष्य मर्दासारखे...
सारखा रडतोस, हळव्या, सारखा !

अवनती ही आज उजव्याची किती...
भासतो डावाच, उजव्यासारखा !

पाळला जावा, असे आहे कुठे ?
शब्द हा माझा न फतव्यासारखा !

केस रात्री मोकळे झाले तुझे...
गंध आला धुंद, मरव्यासारखा !

गोष्ट माझी मी सुरू केली पुढे....
गाव हा बसला उकिडव्यासारखा !

दाबली माझ्यातली ठिणगी कुणी ?
मी अता पसरेन वणव्यासारखा !!

चेहरा डोळ्यांपुढे येतो तुझा...
जे न सुचले, त्याच कडव्यासारखा !!

वाट मृत्यूच्या दिशेने चालता...
लागला हा जन्म चकव्यासारखा !

- प्रदीप कुलकर्णी