काय फायदा?

आज पौर्णिमा नभात काय फायदा?
चांदणे नसे मनात काय फायदा?

वेचला मरंद तू जरी फुलांतुनी
वाटलास ना कुणात! काय फायदा?

पोटचे विकूनही न पोटभर मिळे
जन्म देउनी जगात काय फायदा?

चंद्र, चांदण्या खुडून आणशीलही
भाकरी न जर पुढयात काय फायदा?

दात आपलेच आणि ओठ आपले
गप्प बैस! बोलण्यात काय फायदा?

धावशील शर्यतीत जिंकण्यास तू
अडथळा ठरेल जात! काय फायदा?

शोधलेस नीट तर तुला मिळेलही
नजर ती न जर तुझ्यात काय फायदा?

ज्यात त्यात पाहतात फायदा सदा
राहुनी अश्या जनात काय फायदा?

तळटीप : वैभव जोशी ह्यांच्या सुचनेनुसार काही बदल करून ही गजल सादर केली आहे.