कसा करावा या भयगंडाचा निचरा

कसा करावा या भयगंडाचा निचरा
माझ्या या गावातच झालो मी उपरा

या वेळी पाहु ,कुणाचा नंबर येतो
घात लावुनी बसल्या शहराच्या नजरा

कधी कधी जीवन बनते कचराकुंडी
आपण बनतो त्या कुंडीमधला कचरा

निव्वळ डोकी हवीत येथे हे समजा
नाव गाव ओळख शिक्का सगळे विसरा

वस्तूंनी गजबजलेल्या हाटी आपण
वस्तू बनतो, बनतो वस्तूचा नखरा

नको नकोशा दिवसांशी बोलणे नको
झाकुन ठेऊ भाग मनाचा हा दुखरा.....

मेंदू अपुला म्हणजे लोकल ट्रेन जशी
सापडेल त्या आठवणीचा बाक धरा