..........................................
माझ्या कुशीत ...!
..........................................
माझ्यासवे निवांत बोलणार आज मी !
माझा नवाच अर्थ शोधणार आज मी !
वेडा, खुळा असेन, मी असेन बावळा...
तुमच्या सभेत खास शोभणार आज मी !
आलास तावडीत आज तू बरा मना ...
आता तुला तसा न सोडणार आज मी !
काढू पुन्हा तुझा कशास मी खुजेपणा ?
माझीच रेष उंच ओढणार आज मी !
डोळ्यांत दाटतात कोरडीच आसवे...
कुठले कळे न दुःख सोसणार आज मी !
थोडी तरी हवीच हालचाल भोवती...
या सावलीत प्राण ओतणार आज मी !
घेऊन सोबतीस तोच एकटेपणा...
माझ्या कुशीत गाढ झोपणार आज मी !
- प्रदीप कुलकर्णी
गझल
- प्रतिसाद देण्यासाठी येण्याची नोंद करा