मदारी

तू मदारी - खेळवीशी लीलया हे शब्द सारे
बघ कुणाचा जीव जातो, हा विखारी खेळ का रे?

चढवणे मी बंद केले - साहसी माझ्या शिडांना
वाहणे थांबून गेले आठवांचे भण्ण वारे

मोडले घरटेच त्याचे, पंखही उसवून जाती
भरवताना भावनांच्या चोचल्यांना चिमणचारे

ऐकतो की लांघले तू पावलांनी विश्व सारे
घे तुला आकाश माझे, घे तुला हे सूर्यतारे

येथ जो तो देव झाला, बांधतो अपुलीच पूजा
ईश आता मुक्त झाला, राऊळाची बंद दारे