नार ही...!

..........................
नार ही...!
..........................

राम आयुष्यात नाही; जानकी नाही !
तेवढी नाहीच; माझी लायकी नाही !

दान दैवाने दिले भरपूर दुःखांचे...
नेमकी माझीच झोळी फाटकी नाही !

जाहली शहरांपरी नखरेल गावेही...
राहिली गावांत आता गावकी नाही !

चारचौघांच्यात कोठे ढाळता येती ?
आपुली अश्रूंवरीही मालकी नाही !

चार शब्दांनी तुझ्या हुरळू कशाला मी ?
सांत्वनाची रीत का ही नाटकी नाही ?

यातली काही फळे आहेत वाणाची...
ही अढी सारीच काही नासकी नाही !

सोसण्याचे खेळ सारे दावुनी झाले...
मात्र कोणीही दिली शाबासकी नाही !!

ऐनवेळी राखतो अवसान शर्थीने...
तेवढा नाही, मना, मी घातकी नाही !

मी तुला मोठ्या मनाने माफही केले...
चूक ही माझी परंतू बारकी नाही !

आर्जवे जो तो करी येथे प्रसिद्धीची...
नार ही सांगा कुणाची लाडकी नाही ?

-प्रदीप कुलकर्णी