नवा चंद्र

मी जिवाची अपुल्या चेतवुनी वात पुन्हा;
दाट काळोख पुसायास बसे गात पुन्हा

पाहिले वाकुन तू लाजत पाण्यावरती
दावला एक नवा चंद्र तलावात पुन्हा

पूर्ण गावात तुझ्या एक दिसेना पुतळा--
कोणता सांग तुझा धर्म तुझी जात पुन्हा?

या स्थळी शोध उद्या तू मिलनाची किरणे
चांदणे सांडुन जाईल इथे रात पुन्हा

योजना पारित होतील महालांकरिता--
लोक विस्थापित होतील प्रकल्पात पुन्हा

पाळले पोपट खातात हमेशा हुरडा--
शोधतो एक अम्ही घास कुटारात पुन्हा

तू नको न्हाउस पाण्यात खुले या प्रहरी---
लावते काय उभी आगच डोहात पुन्हा?

खुद्द वाऱ्यावर ज्याचे जगणे विस्कटले--
तो जगाचीच व्यथा बांधिल शब्दात पुन्हा !

मी कळ्या टाळुन काटे उचलाया फिरतो---
कोण देईल मला साथ प्रवासात पुन्हा ?