...पेटारा !

...................................
...पेटारा !
...................................

चार किरणांच्या गजांचा घेतला थारा कधी मी ?
बेइमानी तुजसवे केली न अंधारा कधी मी !

मी रहस्ये घेतली जाणून साऱयांचीच सारी....
शेवटी कळणार का माझा मला सारा कधी मी ?

मी धुळीच्याही कणाला मानतो पृथ्वीप्रमाणे...
उंच आकाशातला होईन का तारा कधी मी ?

वेगळे गाणे जरी हे चारचौघांहून माझे...
सूर आहे लावलेला, सांग तू, न्यारा कधी मी ?

पाठलागाची तुला नाही दिली बिलकूल संधी...
पाहुनी दुःखा तुला केला न पोबारा कधी मी !

मी कधी दिसलो कुणाला ? लागलो हाती कुणाच्या ?
...भासलो वारा कधी मी ! ...वाटलो पारा कधी मी !

पाहिले निष्पर्ण त्या झाडाकडे मी तुच्छतेने...
व्हायचो नाही जणू अजिबात म्हातारा कधी मी !!

भेट आयुष्या तुझीही थेट होईना अताशा...
सांग, तुज भेटायला येऊ कुणाद्वारा, कधी मी ?

ज्या चिजा दिसल्या तुम्हाला, मामुली आहेत साऱया...
आणला तुमच्यापुढे सारा न पेटारा कधी मी !

- प्रदीप कुलकर्णी
...................................