पोरी....

नको फिरू तू उन्हात तपत्या वणवण पोरी....
तुझीच काया बनते आहे जळतण पोरी....!

खोडलेस तू लिहिता लिहिता नाव जरीही ..
कसे खोडशी हृदयावरले गोंदण पोरी....?

"दु:ख लपवले" सांगतात पडलेल्या भेगा..
तरी कितीदा तू सारवते अंगण पोरी....

'स्वप्न जेवढे सुंदर तितके कुरूप वास्तव..'
पहा स्वप्न तू, सोड पहाणे दरपण पोरी....

घासलेटच्या आणि विषाच्या दिल्या बाटल्या..
काय द्यायचे तुला आणखी आंदण पोरी..!!!

अमित वाघ. "गुरूमंदिर", सुधीर कॉलनी, अकोला 444005.
दुरध्वनि क्र. :  9850239882; 9970167572.
www.gazalnavihotanna.blogspot.com