...शून्य माझी कलमकारी !!

.....................................
...शून्य माझी कलमकारी !!
.....................................

`मित्र ` एखादा मला भेटेल कोठे समविचारी ?
जो कधी करणार नाही काजव्याची मिनतवारी !

मी तुला आनंद देतो, तू मला थोडे हसू दे...
जीवनाचे नाव आहे हीच, असली उसनवारी !

ज्या सुखांसाठी जिवाची लावली मी काल बाजी...
आज येऊ लागली का त्या सुखांची मज शिसारी ?

ते शहाण्याची कराया लागले आहेत व्याख्या..
...दोन वेड्यांची कधीची चालली ही मगजमारी !!

हा उन्हाचा एवढा तुकडाच का शालीन झाला ?
कोण येथे चांदणे उधळून गेले भरदुपारी ?

बोल, अधिकारात कुठल्या दूषणे देशी मला तू ?
बोल, तू केलीस का माझी कधीही तरफदारी ?

दर्शनी भागात शोभेच्या फुलांना बहर आला
...पण जुई फुललीच नाही एकदाही परसदारी !

राबतो सारेच आयुष्या तुझ्या संस्थेत आम्ही...
नोकरी ही श्वास घेण्याची...फुकाची, बिनपगारी !!

एकही अश्रू कुणाचा जर न मी पुसला कधीही...
व्यर्थ ही कविताच माझी ! शून्य माझी कलमकारी !!

- प्रदीप कुलकर्णी