उ:शाप

स्वप्नवेड्या पापण्यांना आसवांचा शाप का?
पुण्यवंतांच्या जगी या पुण्य ठरते पाप का?

फूलवेड्या त्या गुलाबाचे जिणे काट्यांमध्ये,
गंधवेड्या चंदनाला वेढलेले साप का?

कोणते हे जीवघेणे दु:ख गासी कोकिळे?
भासती भेसूर रडणे हे तुझे आलाप का?

तू स्वतः स्वीकारली ही वंचना, ही बंधने,
व्यर्थ हा त्रागा कशाला? व्यर्थ हा संताप का?

तू दिलेला जीवनाचा शाप मी स्वीकारला,
का तुझ्या ओठी न येई अजुनही उ:शाप, का?