या उदास रात्री
राहू नकोस दूर या उदास रात्री
मनी उठे काहूर या उदास रात्री
जरी सारले हळवेपण मी मागे
का वाटे हुरहूर या उदास रात्री?
कळीस नाही भान दुखर्या वेलीचे
तिचा वेगळा नूर या उदास रात्री..
अता शमले वादळ दिवसाचे पण
अंधाराचा पूर या उदास रात्री
मरूभूमीवर अवचित जळ तसा दिसेल
का मज सौख्यांकूर ? या उदास रात्री
फक्त दीर्घ ही असे निराशा -बाकी
सारे क्षणभंगूर ! या उदास रात्री
'कसे जगायचे रे ?असे खोटे? हसत?
सांग ,काय तुला मंजूर ! या उदास रात्री'
गझल
- प्रतिसाद देण्यासाठी येण्याची नोंद करा