मोजले का तू कधी ?

सोबती सारे किती, मोजले का तू कधी ?
मोसमी वारे किती, मोजले का तू कधी ?

भांडणे रुसणे तुझे अन मनवणे ते तिचे
रे, अरे, कारे किती, मोजले का तू कधी ?

पाहता तव यातना, आसवे ढाळी कुणी
त्यातले खारे किती, मोजले का तू कधी ?

भाषणे ऐकावया लाख जमले लोक ही
आपले नारे किती, मोजले का तू कधी ?

चालता रस्त्यावरी, एकटा मी लक्तरी
ओळ्खी दारे किती, मोजले का तू कधी ?

नाव गाळे नेहमी, सोयरे यादीतले
हे असे झारे किती, मोजले का तू कधी ?

मागण्या येती नव्या अन अपेक्षा वाढती
वाहशी भारे किती, मोजले का तू कधी ?

बघ, पसारा मांडला अंबराने हा पुन्हा
ओंजळी तारे किती, मोजले का तू कधी ?