नवरे

द्यूतात लावणारे धर्मात याच नवरे
एकाच बायकोच्या भोगात पाच नवरे

भरली मनात कोणी लावण्यखाण परकी
पत्नीस टाळण्याची देतात लाच नवरे

संसार जोडताना मरतात बायका अन
पाहून बारबाला करतात नाच नवरे

विश्वास बायकोचा रामासही न होता
शंकेत देत जाती ज्वालात आच नवरे

हुंडा लगाम यांचा, चाबूक पौरुषाचा
मारी विवाह-घोड्या पोटात टाच नवरे

होताच रात यांची मर्दानगी उफाळे
दु:खात षंढ, वरती, बनतात जाच नवरे