उशीर झाला तेव्हा कळले उशीर झालेला आहे

सवयीने मज प्राण वाटला 'बधीर झालेला आहे'
उशीर झाला तेव्हा कळले उशीर झालेला आहे

तिला वाटतो बहुरंगी मी विदुषक, वेडा, नर्तकही
आज म्हणाली पहा सख्यांनो फकीर झालेला आहे

द्वारपाल, संरक्षक, कुत्रा, सेवक, रंजक, भोईपण
कष्ट काढले मी अन  भलता वजीर झालेला आहे

रोज रोज आळीपाळीने सूर्यचंद्र येउन जाती
थट्टा माझी करण्या जो तो अधीर झालेला आहे

शत्रू झाले आहे पाणी नाहण्यास ती घेते ते
गुन्हेगार छेडतो तिला जो समीर झालेला आहे