जाणीव

आभास होत मजला आवाज येत होता
जो तो खुल्या दिलाने मज दोष देत होता

रेंगाळल्या नभाला पाहून समजले.. तो -
बरसून मजसि त्याचे अस्तित्व देत होता

करण्यास नाव पुढती अनमोल देह झिजला
नावासहीत अंती तोही चितेत होता

कंटाळल्या जिवांनी घरटेच लांब नेता..
ती ही खुशाल होती, तो ही मजेत होता

तालात ख्याल होता, ख्यालास दाद होती,
आनंद एवढा की - जो तो नशेत होता

उंदीर साथ देता गावेच ओस पडली
ढुंढाळिता जगाला.. मृत्यू कवेत होता

जाणीव होत असते विपरीत काय याची;
जे जे म्हणाल माझे - ते ते अचेत होता