मी ही तुझ्यात आहे

जे जे मला हवे ते सारे जगात आहे
पण दोष एवढा की, शंका मनात आहे

कोणांस काय मिळते चिंता तुला कशाला?
फुलवून टाक आधी जे जे तुझ्यात आहे

शोधून फार थकले हे बुद्धिमान सारे
नाकारले तयाला जो काळजात आहे

आसावल्या ढगातुन काहीच पाझरेना
हा दोष कोणता जो या सागरात आहे?

पाहू नकोस काटे, फोडू नकोस फाटे
घे तू सुगंध सारा जो या फुलात आहे

गुर्रावतो तरीही भीती न आज उरली
हा 'शेर' जंगलाचा, पण पिंज-यात आहे

ही वेदना म्हणाली, 'राहू कशी चिरंतन?'
समजाविले सुखाने, 'मी ही तुझ्यात आहे'