काळजी तुला 'तुझ्याविना कसा जगेन मी?'
सोड काळजी, असा कसा, असा जगेन मी?
काय नाव जीवनास द्यायचे ठरेचना
सोडुया उद्यावरी, उद्या जसा जगेन मी
पैंजणे, रुमाल, ओढणी, वहाण, मेखला
वाटते तुला जसा 'तसा तसा' जगेन मी
'जो अधीक दु:ख बाळगे' मला सुखावतो
लावुनी समोर एक आरसा जगेन मी
त्या क्षणास दैवही नवीन मार्ग दाखवी
ज्या क्षणास वाटते 'न फारसा जगेन मी'
आजही उधार मद्य लाभले मला इथे
लोक वाट पाहती 'फसाफसा जगेन मी'
स्वप्न पाहिले 'जगास सांगतोय मी जणू'
'हासवेन मी अजूनही, हसा, जगेन मी'
गझल
- प्रतिसाद देण्यासाठी येण्याची नोंद करा