पावसाने चिकटली माती किती !
घट्ट असुनी निथळली नाती किती !!
प्रेम बर्फासारखे असते, पहा ..
वितळले अन् राहिले हाती किती !
मिळविताना दीप वंशाला तुझ्या ..
तूच बघ रे विझविल्या वाती किती !
पेरता समतास्वरूपी बीज हे ..
उगवल्या खो-यांतुनी जाती किती !
रात्रभर असते मुक्याने साथ जी ..
सोडताना चांदण्या गाती किती !
आज नाही आसमंती चंद्र पण ..
बिगर चंद्राच्या अशा राती किती !
भूतलावरचा भिकारी मागतो-
चित्रगुप्ताच्या वहीं खाती किती !
घाव अजुनी कालचे ओले तरी ..
तळपती नजरेतुनी पाती किती !
अजय अनंत जोशी
९९२३८२०८४२ (पुणे)
गझल
- प्रतिसाद देण्यासाठी येण्याची नोंद करा