जगून काय साधले

जगून काय साधले विचारतोस जीवना
निदान तू तरी असे म्हणू नकोस जीवना

अजून वाटते नवल कसा असेल तो बहर
स्मरून ज्यास तू असा तरारतोस जीवना

मला नकोत हे तुझे जगावरील तोडगे
मला हवा तुझ्यावरी उपाय ठोस जीवना

अरे तिला विचार ना , तिनेच हात सोडले
पुन्हा पुन्हा मलाच का सतावतोस जीवना

जरा कुठे स्वतःस मी तजेलदार वाटतो
जुन्या दम्यापरी कसा बळावतोस जीवना

गरीब माणसांहुनी गरीब वाटतोस तू
नवी उमेद ही कुठून आणतोस जीवना

पुरेल का खरेच ही उरामधील धुगधुगी
अजून वेस दूर ती हजार कोस जीवना