विसावा

जगाया माणसाला अन्न, पाणी अन् विसावा लागतो?
उपाशी झोपताना फक्त आवंढा गिळावा लागतो

निभावावे कसे बेरोजगारांच्या जुन्या गर्दीमधे?
स्वतःचा जीवही कवडीपरी येथे विकावा लागतो

शिवाजी काय होता जाणण्याचा काय आहे फायदा?
शिवाजी फक्त होता आमचा हा वाद व्हावा लागतो

किती गेला पुढे हा देश नुसत्या कागदांवरती पहा
सुखी होण्यास नुसता सूख असल्याचा दिखावा लागतो

कसा झटक्यात येथे योजनांचा बोजवारा वाजतो
अरे, पेन्शन मिळाया प्राण असल्याचा पुरावा लागतो

नवे नाहीच काही होतसे अन्याय होताना अता
जराशी बातमी येण्यासदेखिल जीव जावा लागतो

जगदिश