असे पाण्यामुळे गंगा

अशी मी धबधब्याखाली कधीची नाहते आहे...
जिथे माझ्याच अश्रूंची नदीही वाहते आहे ..!

असे पाण्यामुळे गंगा, नसे गंगेमुळे पाणी;
तसे मरणामुळे जगणे भरूनी वाहते आहे ..!

हव्या शीतल खुणा सार्‍या जगाला तप्त सूर्याच्या..
तशा देऊन मीही चन्द्र बनुनी दाहते आहे ..!

अमावास्या असो वा पौर्णिमा, नसतो फरक काही;
रवीचे येत जाणे रोज पृथ्वी साहते आहे ..!

नसे माझे-तुझे नाते जगाला माहिती म्हणुनी..
तुझेही नाव अभिमानात जगभर राहते आहे ..!

दगड म्हणुनी कधी हिणवून लाथाडू नको देवा !
तुला माझ्याच जागी विश्व सारे पाहते आहे ..!