मी शशीची कोर व्हावे

मी शशीची कोर व्हावे
मुक्त रानी मोर व्हावे

खूप उंडारून झाले
की स्वतःचा दोर व्हावे

कोण लावे नाव मागे?
मीच अल्लड पोर व्हावे

जाग आली, स्वप्न होते
'बेमुरव्वतखोर व्हावे'

माणसे चरली मनावर
आज आपण ढोर व्हावे

बास झाले रोज रुसवे
एकदा घनघोर व्हावे

गप्प मी, नादामधे ती
प्रेमही चतकोर व्हावे?

काळजी माझी कशाला?
माणसांनी थोर व्हावे

आवरेनासा मला मी
त्यात मी शिरजोर व्हावे?

मित्र शत्रू एक झाले
मी कुणाचा जोर व्हावे?

जीव तू व्हावेस माझा
मी जिवाचा घोर व्हावे

आशयाचे गाव, येथे
'बेफिकिरसा' चोर व्हावे