मी मोकळा

आसवांच्या साखळ्या ओवायला मी मोकळा
भावनांना मोकळे सोडायला मी मोकळा

स्वैर शब्दांनी मने उध्वस्त केली केवढी
वादळाशी वारसा जोडायला मी मोकळा

चेहर्‍याने झाकल्या कित्येक नाती जोडली
आरशाशी बोलणे तोडायला मी मोकळा

गीत गाताना सुरांनी काळजाशी टाकले
शब्द सारे पोरके पोसायला मी मोकळा

चाकरीला ठेवलेले सूर्य सारे पांगले
आज माझी सावली ओढायला मी मोकळा

रिक्त आयुष्यातळी थोडे जमेला दाटले
साचलेले शून्य ते मोजायला मी मोकळा

त्या तुझ्यामधुनी कधीची हरवलेली तीच 'तू'
'मी' पुन्हा माझ्यातला शोधायला मी मोकळा

गोठल्या नशिबामध्ये होते 'निरंजन' जागणे
द्या चिता उबदार, अन् झोपायला मी मोकळा!