...स्मरशील तू !

...............................................
...स्मरशील तू !
...............................................
काठावरी गमजा किती करशील तू ?
बुडशील तू; तेव्हाच ना तरशील तू ?

कोठून तारे-तारका आणायच्या...?
माझ्यापुढे आकाश अंथरशील तू !

सलते कुठे निरखून घे आधी जरा...
भलतीकडे नुसतेच टोकरशील तू !

पाण्याप्रमाणे वाहती दुःखे तुझी...
डोळे स्वतःसाठी किती भरशील तू ?

हाती तुझ्या आले न काही शेवटी...
माझा कशाला हात मग धरशील तू ?

माझ्याविना आहे तुला कुठली दिशा ?
माझ्यासवे, माझ्यात वावरशील तू !

चिंधी मला शापून गेली फाटकी...
आयुष्यभर वाराच पांघरशील तू !

जन्मून कायेचा मिळाला फायदा...
पण शेवटी छायेविना मरशील तू !

जाशील मज विसरून तू, हेही खरे...
...हेही खरे, मज सारखी स्मरशील तू !

- प्रदीप कुलकर्णी