'....राहू दे मला माझा !!'
तुला घे चांदणे...अंधार राहू दे मला माझा !
तुला घे फूल...हा अंगार राहू दे मला माझा !
प्रपंचाला तुझ्या येवो सुखांची रेशमी शोभा...
व्यथांचा फाटका संसार राहू दे मला माझा !
तुला जो पाहिजे होता, दिला तो सूर मी दुनिये...
अता हा आतला गंधार राहू दे मला माझा !
पुन्हा मी छेडला जाईन की नाही; कसे सांगू...?
अखेरीचाच हा झंकार राहू दे मला माझा !
कसाही का असेना...चेहरा माझा स्वत:चा हा -
असो वंगाळ की भंगार...राहू दे मला माझा !
मला माझाच राहू दे तुझी सोसायला दु:खे -
तुझ्या दु:खांत अपरंपार राहू दे मला माझा !!
कशी कोठून आणू सभ्यता मी बेगडी, खोटी...?
जरी हा रानटी संस्कार...! राहू दे मला माझा !
खुळी स्वप्ने, शिळी दु:खे, फिक्या आशा, मुके अश्रू...
तुझा नाहीच...हा संभार राहू दे मला माझा !
कुणाचा रंग का घेऊ ? कुणाला रूप का मागू ?
विनंती हीच वारंवार - 'राहू दे मला माझा !!'
- प्रतिसाद देण्यासाठी येण्याची नोंद करा