चालला शब्दांतुनी व्यभिचार आहे
हाच या गावातला आजार आहे
कोणत्याही चांदणीला मूल्य नाही
अन् तरीही मांडला बाजार आहे
राहिले नाही कुठेही फूल ताजे
पाकळ्यांचा रोजचा व्यापार आहे
रोज काळोखात उल्का ठार पडती
सूर्यही आहे तसा लाचार आहे
पोचले अश्रू पहाटे चांदण्यांचे
बोलले दु:खी तुझा शेजार आहे
राहतो आता उपाशी देव माझा
मद्यपींना वाहिले कोठार आहे
तू कशाला ढाळले अश्रू मघाशी ?
कोण येथे चांगला होणार आहे ?
गझल
- प्रतिसाद देण्यासाठी येण्याची नोंद करा