आसवांना ओघळू देऊ नये !
दुःख दुनियेला कळू देऊ नये !
तोल जातानाच का हे जाणवे...
...तोल केव्हाही ढळू देऊ नये !
एकटी सोडू नये संधी कधी
दूर संधीला पळू देऊ नये !
खूप झाले एवढे केले तरी -
फूल फांदीचे गळू देऊ नये !
शब्द हे करतीलही खाणाखुणा
मात्र अर्थांना चळू देऊ नये !
वेळ गेलेली पुन्हा येईल का ?
वेळ आलेली टळू देऊ नये !!
हृदय मागे राहिले असले तरी
पाय माघारी वळू देऊ नये !
कायदा होईलही मागे-पुढे...
`पावसाला कोसळू देऊ नये !!`
मावळू दे सूर्यही अन् चंद्रही...
मात्र आशा मावळू देऊ नये !
शक्य हे प्रेमात आहे का कधी...?
- जीव मी माझा जळू देऊ नये...!
ओ कुणी देणारही नाही, तरी -
हाक देताना हळू देऊ नये !!
नाव नात्याला हवे का नेहमी...?
प्रेम शब्दांनी मळू देऊ नये !
- प्रदीप कुलकर्णी
गझल
- प्रतिसाद देण्यासाठी येण्याची नोंद करा