जन्म हा

वाटला मला तरी सुखात जन्म हा
घेतलाय मानुषी जगात जन्म हा

रीत माहिती कुठे मला जगायची ..
तीच येथ शोधण्या दिलात जन्म हा

जात-पात-पंथ-भेद या इथे किती!
त्यावरी करेल शांत मात जन्म हा

धाय मोकली तरी कुणी न यायचे
वाहिला कुठेतरी पुरात जन्म हा

बाप कोणता न माहिती असे मला
माय सोडते कुण्या पथात जन्म हा

अमृतास घेवुनी कधी न पाहिले,
हाय! का करून सोडलात जन्म हा ?

पाहुनी चहूंकडे बघे दिसायचे
पेटला इथे कुण्या उरांत जन्म हा

जिद्द आणि ध्येय कार्य साधण्या हवे
पाहिजे न चांगल्या घरात जन्म हा

अंश जाहलो तुझा करेन सार्थ मी
भेटला पुढे जरी वनात जन्म हा

सूख पाहिजे सदा पुढे जगास या
घेतला म्हणून वेदनांत जन्म हा