सोपे न माना

टाळणे कंटाळणे सोपे न माना
शायराला पाळणे सोपे न माना

सारखा जातो कुठे मी कोण जाणे
सारखे धुंडाळणे सोपे न माना

वेदनांची दीर्घशी कादंबरी ही
या मनाला चाळणे सोपे न माना

जेवढी येते मजा टोचून आम्हा
तेवढे किंचाळणे सोपे न माना

प्रेम नावाचा गुन्हा केलाय मीही
लोचनांचे वाळणे सोपे न माना

की खडे फेकाल धान्यातून जेव्हा
नाव माझे गाळणे सोपे न माना

हे तुम्हा जमणार नाही, शब्द माझा
बिनक्रिया वाचाळणे सोपे न माना

भेट मृत्यूचीच देते शेवटी ते
जीवनाचे भाळणे सोपे न माना

ते सरावातून येते, यत्न सोडा
आमचे ओशाळणे सोपे न माना

आसवांची ईंधने ओता जराशी
प्रेत माझे जाळणे सोपे न माना