लाज !

.........................................
लाज ! 
.........................................

बांधले गेले जरी अंदाज काही !
योग्य नाही बोलणे मी आज काही !

खोल हो आधी सुमद्रासारखा तू....
कोरड्या वाळूस नसते गाज काही !

आव कोणीही किती आणोत आता...
आणता येणार नाही बाज काही !

बाब आधी मुद्दलाची संपवू या...
दे, नको देऊ, मला तू व्याज काही !

तृप्त पोटाचा मला सल्ला असा की -
लष्कराच्या भाकऱ्या तू भाज काही !

जो नको तो अर्थसुद्धा सांगती हे...!
शब्द कावेबाज, धोकेबाज काही !!

भंगली स्वप्ने; उमेदी संपल्या का ?
व्हायचे नाही असे नाराज काही !

राहिलो मी शांत, झाला फायदा हा....
बंद झाले येथले आवाज काही !

भीड माझीही अताशा चेपलेली...
राहिली नाही तुलाही लाज काही !

- प्रदीप कुलकर्णी