====================
भेट चोरटी पुन्हा जहाल होत जाउदे,
आजही खुशाल गाल लाल होत जाउदे...
चंद्र, सूर्य, तारकांस मान झुंबरे इथे
झोपडीस आपल्या महाल होत जाउदे..
धारदार शब्द चार आरपार होऊ दे,
लेखणीसही कधी 'मशाल' होत जाउदे !
दात सुस्थितीत अन् चणे समोर ठेवले,
ईश्वरा ! कधी अशी कमाल होत जाउदे...
कोपरा धरून थांबलीत स्वप्न चोरटी,
आणुनी समोर ती हलाल होत जाउदे...
ऐसपैस राहतील संकुचीत माणसे,
तू मनास एवढे विशाल होत जाउदे..
देत राहतो तुला मरेपर्यंत उत्तरे..
जीवना, असेच तू सवाल होत जाउदे !!
===================
गझल
- प्रतिसाद देण्यासाठी येण्याची नोंद करा