तरही गझल- कसे सावरावे

ॠतू वाहणारे किती मी सहावे
तुझे चंद्र आता कसे सावरावे ।[ही ़ किरण येले यांची गझल आहे.त्यावरील तरही गझल.]

तुझ्यावीण येथे कसे मी रहावे
तुझे चंद्र आता कसे सावरावे?

सख्या सांग झाला गुन्हा कोणता रे
तुझे मौन आता कसे साहवावे?

तुझे श्वास नसता इथे आस-पास
दिव्याने असे वांझ  का फडफडावे ।

तुझ्या आठवांना क्षणी ना विसावे
कसे सांग माझ्या मना आवरावे ।

अरे कात टाकोनि आले नव्याने
नव्या या शरीरी तुला गोंदवावे ।

कुठे मागते मी सुखातील वाटा
तुझ्या आतले फक्त तू घाव द्यावे ।

असा तू,तसा तू,विदेही जसा तू
तुझ्यातुनी  मुक्त मी वावरावे ।