तयारी...

करा माणसे जोडण्याची तयारी
दुरावे पुन्हा तोडण्याची तयारी

यशाची असे भूक त्यांची निराळी
खरे बोलणे सोडण्याची तयारी...!

दिसे नाव यादीत पहिलेच माझे..;
तरी चालली खोडण्याची तयारी...!

कुणाच्या पुढे वाकण्याचा न बाणा
मनाची जरी मोडण्याची तयारी..!

गरीबीमुळे एक वरदान लाभे..,
पहाडासही फोडण्याची तयारी..

कशाची करी रोज घरदार घाई..?
जणू गावही सोडण्याची तयारी...!

सदा राखतो मी मनी दांभिकांना..
पुराव्यानिशी झोडण्याची तयारी...

-- संतोष कुलकर्णी