...काय करू मी ?

...काय करू मी ?

सांग जगू की सांग मरू मी...काय करू मी ?
काय करू मी...काय करू मी...काय करू मी ?

एकच सांगावेस कराया...शक्य मला जे -
बोल, स्मरू की तुज विसरू मी... काय करू मी  ?

झेप कशी घेऊ...? गगनाची सक्त मनाई... !
पंख अता कोठे पसरू मी...काय करू मी ?

का जम कोठेही न बसे...बस्तान बसेना...
कायमचा का होतकरू मी...काय करू मी ?

स्वप्न कितीदा तेच बघू मी रोज नव्याने ?
रंग कितीदा तेच भरू मी...काय करू मी ?

सोबत घेऊ आज कुणाला....दूरच सारे...
हात कुणाचा सांग धरू मी...काय करू मी ?

गाव कसा... येथे घर नाही वा पडवीही...
हे न कळे कोठे उतरू मी...काय करू मी ?

रोज खुणावे एक अनोखी वाट परंतू...
- थांबवलेला वाटसरू मी...काय करू मी ?

आवड आहे काय तुझी ते सांग मला तू...!
पूर बनू की संथ झरू मी...काय करू मी ?

मान्यच आहे, आजवरी होतो वठलेला...
काय नको आता बहरू मी...काय करू मी ?

- प्रदीप कुलकर्णी