स्वातंत्र्य

जखमेवरुन खपली काढू नकोस माझ्या;
आधीच रक्त नाही देहात फार माझ्या.

घायाळ पाखराने घ्यावी नवी भरारी;
नभ हे मुठीत यावे तैसे करात  माझ्या.

देहात आग जळते आगीत देह जळतो;
जळण्याशिवाय सखये नशिबात काय  माझ्या.

नेऊ नको मला त्या स्वप्नात तारकांच्या;
डोळ्यात चंद्र तारे रडतात खूप  माझ्या.

स्वातंत्र्य जीवनाला होईल प्राप्त केव्हा;
माझाच कैदखाना कैदेत मीच माझ्या.

                             - मनोज सोनोने
                               संवेदना रायटर्स कंम्बाईन,
                               अकोला.

[अकारान्त अन्त्ययमके असल्याने विचाराधीन करण्यात येत आहे--विश्वस्त]